Imyumvire y’abaturage yabaye imbogamizi mu kwirinda COVID-19

Abaturage bo mu murenge wa kinigi mu karere ka Musanze mu Ntara y’amajyaruguru, baracyafite imyumvire ituma batubahiriza ingamba zo kwirinda COVID-19.

Bamwe mu baturage bo muri uyu murenge, usanga batubahiriza gahunda zashyizweho nko; kwambara agapfukamunwa,guhana intera ya metero hagati y’umuntu n’undi, bakavuga ko babiterwa n’uko bose baba baziranye nta wapfa kwanduza undi.

Niyitegeka wo mu gasantere ka Bisate agira ati: “Kuba abantu batubahiriza amwe mu mabwiriza yashyizweho biterwa n’imyumvire baba bifitiye, usanga umuntu ava mu rugo adatwaye agapfukamunwa kuko aba yumva nta muntu w’ahandi baribuhure uretse uwo baziranye cyangwa baturanye gusa.”

Ibi kandi abihuza na Nyirahategekimana Beatrice, uvuga ko n’ubwo aya mabwiriza abaturage bayazi ariko usanga hari abayirengagiza nkana.

Ati: “Ubundi amabwiriza turayazi, ariko usanga bamwe batayubahiriza. Ugasanga batanga impamvu zabo, nko kuba ngo bakambara(Agapfukamunwa) kakabaheza umwuka, kuba abantu muziranye batakwanduza, cyangwa ugasanga akubwira ko atakambaye kubera ko yagafuze. Ibi rero hari igihe aba ari imyumvire y’abantu.”

Kuri iki kibazo k’imyumvire,Umunyamabanga nshingwabikorwa w’umurenge wa Kinigi Twagirimana Innocent, avuga ko hari aho kikigaragara ariko bakomeje gukora ubukangurambaga.

Ati: “Imyumvire y’abaturage rero niyo itinda guhinduka, icyo dukora ni uguhozaho kwigisha kugirango nabo babashe kumva ko kubahiriza amabwiriza atari umutwaro.”

Umunyamabanga nshingwabikorwa w’umurenge wa Kinigi ,Twagirimana Innocent

Kuva tariki ya 04 Gicurasi 2020, Goverinoma y’u Rwanda yashyizeho amabwiriza mashya yo koroshya gahunda ya guma mu rugo yari imaze iminsi irenga 40, nyuma y’uko mu Rwanda hagaragaye umurwayi wa mbere wa COVID-19.

Amwe mu mabwiriza yashyizweho ni uko imwe mu mirimo ikomorerwa ikongera gukora ariko ingamba zo kwirinda ikwirakwira ry’iki cyorezo zigakomeza gukurikizwa nko; Kwambara agapfukamunwa mu gihe cyose ugiye ahahurira abantu benshi, gukaraba intoki kenshi cyangwa gukoresha umuti wica udukoko, ndetse no guhana intera ya metero hagati y’umuntu n’undi. Kutubahiriza aya mabwiriza byongera ibyago byo gukwirakwiza iki cyorezo mu Gihugu.

Izabayo Jean Aime Desire

 1,200 total views,  2 views today

Leave a Reply

Your email address will not be published. Required fields are marked *