Inama no gushyingirwa mu nsengero na Kiriziya byakomorewe

Inama y’Abaminisitiri yateranye kuri uyu wa kabiri tariki 16 Kamena 2020, yagarutse Ku myanzuro y’ingamba zo kwirinda COVID-19 ifungura imwe mu mirimo yari yarahagaritswe, harimo Inama zo muri Hoteli no gushyingirwa mu Nsengero na Kiliziya ariko humahirizwa amabwiriza y’ubwirinzi.

Iyi nama yateraniye muri Village Urugwiro iyobowe na Perezida wa Repubulika y’u Rwanda Paul Kagame, ikurikira iyari iherutse kuba tariki 02 Kamena 2020 aho biteganyijwe ko izongera guterana nyuma y’iminsi 15.

Zimwe muri serivisi zakomorewe ziyongera kuzari zisanzwe harimo;

  • Ubukerarugendo bwo mu gihugu, n’Ubukerarugendo mpuzamahanga Ku bashyitsi baje mu ndege zihariye (Charter Flights), baba abantu ku giti cyabo cyangwa abaje mu matsinda.
  • Hoteli zizakomeza gukora ndetse zemerewe no kwakira Inama, hubahirizwa amabwiriza yo kwirinda COVID-19. Aha kandi Hotel zirashishikarizwa kugira uruhare mu bukerarugendo bw’imbere mu gihugu.
  • Imihango yo gushyingirwa mu nsengero iremewe ariko ikitabirwa n’abantu batarenze 30. Minisiteri y’Ubutegetsi bw’igihugu ikazatanga amabwiriza arambuye kuri iyi ngingo.
  • Ni mu gihe kandi ishyingirwa rikorewe imbere y’ubuyobozi (Muri Leta) ryemewe ariko rikitabirwa n’abantu batarenze 30.
  • Imihango y’idini yo guherekeza cyangwa gusezerera uwapfuye mu nsengero iremewe ariko ikitabirwa n’abatarenze 30. Aha imihango yo gushyingura nayo ntirenza abantu 30.
  • Iyi myanzuro kandi yakomeje gushimangira ko uturere twa Rusizi na Rubavu tuguma mu kato.

Zaba izi serivisi zakomorewe ndetse n’izisanzwe zikora, zose zigomba kubahiriza amabwiriza y’ubwirinzi arimo; guhana intera ya metero hagati y’umuntu n’undi, gukaraba intoki kenshi gashoboka,ndetse no kwambara agapfukamunwa mu gihe cyose umuntu agiye ahahurira abantu benshi.

Kuva muri Werurwe 2020 ubwo icyorezo cya COVID-19 cyagaragaye mu Rwanda, abantu 636 bamaze kucyandura, muri bo 338 baragikize, 2 nibo bamaze kwita Imana, iyi mibare ikaba igaragaza ko abakirwaye ari 296, hakaba hamaze gufatwa ibipimo 96,801 mu gihugu hose.

Imyanzuro y’Inama y’Abaminisitiri yabereye muri Village Urugwiro iyobowe na Perezida wa Repubulika

 2,270 total views,  2 views today

Leave a Reply

Your email address will not be published. Required fields are marked *