Abantu 9 bishwe na COVID-19 umunsi umwe mu Rwanda

Abantu 9 bahitanwe na COVID-19 mu masaha 24 gusa, bikaba ari incuro ya mbere hatangajwe umubare mu nini w’abishwe n’iki cyorezo umunsi umwe mu Rwanda.

Mu itangazo rya Minisiteri y’ubuzima ryo kuri uyu wa 21 Mutarama 2021, rivuga ko abantu 9 bishwe n’icyorezo cya COVID-19.

Iri tangazo ryanyujijwe ku rubuga rwa Twitter rwa Minisiteri y’ubuzima mu Rwanda, rivugako kuri uyu wa kane hagaragaye abantu bashya 310 banduye COVID-19 mu bipimo 4,359 byafashwe mu masaha 24, ibi bikaba byatumye umubare w’abamaze kwandura iki cyirezo bose hamwe baba 12,170 abamaze kugikira ni 7,973 muri bo 161 bakize mu masaha 24 ashize, mu gihe kimaze guhitana 162 muri bo 9 bakaba bapfuye uyu munsi.

Mu bagaragaye bashya uyu munsi 85 babonetse muri Kigali, Gatsibo: 57, Ngoma: 41, Gicumbi: 27, Huye: 18, Rulindo: 11, Karongi: 11, Musanze: 10, Nyagatare: 9, Gisagara: 7, Nyanza: 6, Kirehe: 6. Burera: 5, Rubavu : 5, Muhanga: 3, Rusizi: 2, Kamonyi: 2, Nyamagabe: 2, Ruhango: 2, Nyamasheke: 1.

Ni kuncuro ya mbere mu Rwanda hatangajwe umubare mu nini w’abishwe na COVID-19 ku munsi umwe.

Ibi bibaye mu gihe Inama y’Abaminisitiri yo kuwa 18 Mutarama 2021, yemeje gahunda ya Guma mu rugo mu mujyi wa Kigali wose kubera ubwiyongere bw’abandura COVID-19, uyu munsi ukaba ari uwa gatatu ushize abatuye mu mujyi wa Kigali bari muri Guma mu rugo.

Tariki ya 20 Mutarama 2021 kandi u Rwanda rukaba rwarakiriye doze ibihumbi 18 by’imiti igabanya ubukana ku barembejwe n’iki cyorezo ikazajya yifashishwa mu kongerera ubudahangarwa abarwayi barembye cyane.

Kuri uyu wa kane tariki 21 Mutarama 2021, nibwo Ikigo k’Igihugu gishinzwe ubuzima mu Rwanda (RBC), cyatangaje ko u Rwanda rwatumije inkingo Miliyoni imwe zigiye guhabwa abazikeneye bibanze, aho biteganywa ko zishobora gutangira gutangwa mu ntangiriro z’ukwezi gutaha kwa Gashyantare 2021 cyangwa Mbere yaho.