Perezida Kagame yahembwe nk’indashyikirwa mu guteza imbere Ruhago Nyafurika (Amafoto)

Perezida Kagame n’Umwami wa Maroc, Mohammed VI bahawe ishimwe ry’indashyikirwa n’Impuzamashyiramwe y’Umupira w’Amaguru muri Afurika, CAF, ku bw’uruhare rwabo mu iterambere rya ruhago.

Ni igihembo baherewe mu muhango wateguwe na CAF ushamikiye ku Nteko Rusange ya 73 y’Ishyirahamwe ry’Umupira w’Amaguru ku Isi, FIFA. Wabereye muri Serena Hotel ku mugoroba wo ku wa Kabiri, tariki ya 14 Werurwe 2023.

Perezida wa FIFA, Gianni Infantino, wari witabiriye uyu muhango, yavuze ko ibihembo byatanzwe, bigenewe abayobozi babiri “b’indashyikirwa ku bw’akazi kadasanzwe bakoze”.

Igihembo cya Maroc cyakiriwe na Minisitiri w’Uburezi na Siporo wa Maroc, Chakib Benmoussa. Mu ijambo ryo kucyakira, yavuze ko Maroc igiye kwifatanya na Espagne hamwe na Portugal, bikakira igikombe cy’Isi cyo mu 2030.

Ati “Iyi kandidatire idasanzwe mu mateka y’Umupira w’Amaguru, izahuriza hamwe Afurika n’u Burayi, Amajyaruguru n’Amajyepfo ya Méditerranée na Afurika, Abarabu n’Abanyaburayi hamwe n’abo mu nkengero za Méditerranée.”

Perezida Kagame yavuze ko igihembo yahawe, ari kimwe mu bintu umuntu aba atiteze ko yabona. Yavuze ko yacyakiriye n’amaboko yombi kubera agaciro kacyo, ashimira CAF ku bwo kukimushyikiriza.

Umukuru w’Igihugu yavuze ko umupira w’amaguru ufite amateka akomeye mu mateka y’u Rwanda ku buryo no mu gihe cy’urugamba rwo kubohora igihugu, benshi babaga bawutekerezaho.

Ati “Twabashije gukura amasomo menshi mu mateka yacu. Kimwe mu bintu byadufashije kunyura mu bihe bigoye twari turimo, yari umupira w’amaguru.”

Perezida Kagame yavuze ko mbere y’amezi make ngo igihugu kigwirwe n’amahano ya Jenoside mu 1994, hari ivangura n’ibindi bikorwa bibi, umupira w’amaguru wahurije abantu hamwe.

Ati “Ubwo twagiraga igihe cyo guhagarika imirwano, kimwe mu bintu byatekerejweho bwa mbere wari umupira w’amaguru.”

Perezida Kagame yavuze ko hari ibitaranoga ku iterambere rya ruhago mu Rwanda nubwo hashyirwamo imbaraga. Ni mu gihe kuko amakipe y’umupira w’amaguru yaba ay’igihugu ndetse n’andi, ataragera ku rwego rwo guhatana n’andi akomeye ku mugabane cyangwa se hanze yawo.

Gusa ngo ku bufasha bwa FIFA na CAF, u Rwanda rwiteguye gukomeza gukora ibyisumbuyeho.

Ati “Ntituragera aho tugomba kuba turi ariko kuba muri hano, imbaraga, amasezerano ya CAF, FIFA n’izindi nshuti zacu turizera ko bidatinze tuzaba turi aho tugomba kuba turi kandi turi kugendera mu ntambwe z’abamaze kugera ku rwego rwo hejuru ku Isi.’’

Perezida Kagame yashimye Maroc yitwaye neza mu Gikombe cy’Isi giheruka kubera muri Qatar mu mpera za 2022. Yatsindiwe ku mukino w’umwanya wa gatatu na Croatia ibitego 2-1.

Ati “Afurika ifite impano ariko ntibakwiye buri gihe kujya hanze ngo bazamure urwego rwabo. Ndavuga ko dukwiye guharanira ko igituma bajya hariya, bakigeraho bari hano. Ni yo mpamvu ibiri gukorwa na CAF na FIFA bishimishije.’’

“Uko Maroc yitwaye mu Gikombe cy’Isi ni urugero rwiza rw’ibishoboka. Dukwiye guharanira kwigana urugero rwiza nka ruriya kandi bikaturemamo umuhate wo gukora ibyiza birenzeho, twe abakina ruhago n’abayikunda. Abaturage b’ibihugu byacu bari muri ibi kandi dukwiye guharanira ko bibashimisha.’’

Amafoto: IGIHE