DRC: Uwari Umuvugizi wa Moïse Katumbi utavuga rumwe n’ubutegetsi yasanzwe yapfuye

Nyuma yo kumara iminsi batabona Depite Okende utavuga rumwe n’ubutegetsi kuri uyu wa Gatatu tariki 12 Nyakanga, nibwo abarwanashyaka be batangaje ko yabuze hatangira ibikorwa byo kumushakisha hirya no hino.

Chérubin Okende usanzwe ari umudepite akaba n’Umuvugizi w’Ishyaka Ensemble pour la République ry’umunyapolitiki utavuga rumwe n’ubutegetsi bwa Repubulika Iharanira Demokarasi ya Congo, Moïse Katumbi, yabonetse yapfuye nyuma yo kuburirwa irengero kuva kuri uyu wa 12 Nyakanga 2023.

Ni nyuma y’uko ibikorwa byo gushimuta muri Kinshasa bimaze gufata indi ntera, by’umwihariko mu mezi asatira amatora ya Perezida.

Imodoka ya Chérubin Okende wabaye Minisitiri w’ubwikorezi yaje kuboneka ku muhanda uzwi nka Poids-Lourds, uyu mugabo abashinzwe umutekano basanga yashizemo umwuka.

Moïse wari witabiriye inama y’Ishyirahamwe ry’umupira w’amaguru muri Afurika, i Abidjan muri Cote d’Ivoire, yahise asubika urugendo rwe igitaraganya.

Apfuye nyuma y’uko yari yatumijwe n’Urukiko rurengera itegeko nshinga kuri uyu wa Kane, ngo haganirwe ku nkomoko y’imitungo ye nyuma yo kuva muri guverinoma.

Ni igikorwa bivugwa ko cyari kigamije kugenzura ko atagira uruhare u bikorwa byo kwigwizaho umutungo mu buryo butemewe cyangwa kunyereza umutungo.

Ku mugoroba wo kuri uyu wa Gatatu, nibwo abantu be ba hafi batangaje ko yashimuswe n’abantu bitwaje intwaro ariko batambaye imyenda ibaranga.

Uyu mugabo ni uwa kabiri ukomeye mu ishyaka rya Katumbi wigijweyo nyuma y’umujyanama we Salomon Kalonda uheruka gutabwa muri yombi.