Sgt Eustache Tabaro uherutse kurasirwa muri Centrafrique yashyinguwe-AMAFOTO

Umusirikare w’umunyarwanda Sgt Eustache Tabaro uherutse kugwa mu butumwa bw’amahoro mu gihugu cya Centrafrique yashyinguwe.

Ni igikorwa cyabaye kuri uyu wa Kabiri tariki 18 Nyakanga 2023, aho uyu musirikare yashyinguwe mu cyubahiro ku irimbi rya gisirikare riherereye i Kanombe.

Nyakwigendera yashyinguwe n’abarimo abayobozi batandukanye bari mu nzengo nkuru z’umutekano, abagize umuryango we ndetse n’inshuti z’umuryango.

Yabanje gusezerwaho havuga ibigwi byaranze uyu musirikare waguye ku rugamba mu butumwa bw’amahoro mu gihugu cya Centrafrique.

Uyu muhango wari uyobowe n’umuyobozi wungirije w’ingabo zidasanzwe, Col Augustin Migabo, mu izina ry’umuyobozi mukuru w’ingabo wa RDF, Lt Gen Mubarakh Muganga.