Carlo Ancelotti yaciye impaka ku mukinnyi abona ukwiriye Ballon d’Or

Umutoza w’ikipe ya Real Madrid Carlo Ancelotti yageneye umukinnyi we Vinícius Júnior Ballon d’Or ikomeje kwibazwaho uzayegukanye.

Mu kiganiro Ancelotti yahawe na Obi ubwo yamubazaga umukinnyi abona ukwiriye guhabwa igihembo cya Balloon d’Or, uyu mutoza atazuyaje yavuze ko kuri we abona Umunya-Brazil Vinícius Júnior.

Yagize ati “Ndatekereza Vinícius agiye gutsinda kubera ko n’umukinnyi w’impano kandi ni umwe mu bakoze umwaka ushize.”

Ibi nyamara umutoza Ancelotti abitangaje mu gihe, mu ikipe ye atoza ya Real Madrid harimo abakinnyi barenze umwe bahabwa amahirwe yo kuba bakwegukana uyu mupira wa zahabu.

Ni mugihe kandi avuga Vinícius Júnior ikipe ye y’Igihugu ya Brazil itarigeze igera kure mu irushanwa rya Copa America ryegukanwe n’ikipe ya Argentina ya Messi.

Abo nta bandi ni umwongerera ‘Jude Bellingham’ ukina inyuma y’abataha izamu n’Umunya-Espagne Carvajal.

Aba bombi babashije kugera ku mukino wa nyuma w’igikombe cya EURO 2024, ubwo Ubwongereza bwahuraga n’ikipe y’igihugu ya Espagne ndetse Carvajal abasha kwegukana icyo gikombe.

Real Madrid ibarizwamo abo bakinnyi bose niyo yegukanye Champions League y’umwaka ushize ndetse n’igikombe cya shampiyona ya Espagne ‘La Liga’.

Vinícius Júnior yagize uruhare mu mwaka w’imikino 2023/2024, aho yatsinze ibitego 29, muri La Liga 15, Champions League 6, Copa America 2.

Ni mugihe Jude Bellingham yagize uruhare mu mwaka w’imikino 2023/2024, aho yatsinze ibitego 25, muri La Liga 19, Champions League 4, n’ibitego 2 yatsindiye ikipe y’Igihugu muri Euro 2024.

Naho Carvajal yabashije gutsindira ikipe ye ya Real Madrid ibitego 4 muri La Liga, muri Champions League atsinda igitego 1, mugihe n’irushanwa rya Euro ikipe ye yegukanye igikombe yayitsindiye igitego 1.