Nyuma y’imyaka 5, Petit stade yavuguruwe igiye kwakira Basketball hakinwa imikino ya ‘BetPawa Playoffs’ 2024

Petit stade yubatse i Remera mu gace kahariwe siporo gusa, igiye kongera kwakiraho imikino ya Basketball irimo n’imikino ya kamparampaka ‘BetPawa Playoffs’ 2024 nyuma y’igihe kirekire.

Ni nyuma y’imyaka itanu dore ko mu mwaka 2019, aribwo ibikorwa byose byaberaga kuri Petit stade na sitade Amahoro byahagaritswe kugira ngo bivugururwe.

Ni stade ubusanzwe yakiraga imikino itandukanye y’intoki irimo na Basketball, aho yakinirwaga abantu baticaye neza ndetse n’ikibuga cyakinirwaga kikaba kitari kigendanye n’igihe.

Kuri ubu Petit stade yavuguruwe kuri ubu yashyizwemo intebe, aho abantu bicara neza bakurikirana iyo mikino ndetse n’ikibuga gikinirwaho kikaba cyujuje ibisabwa byose.

Icyakora cyo n’ubwo yavuguruwe imyanya yicarwamo yagizwe 1500 bicaye neza mu ntebe, bitandukanye na mbere aho benshi bicara ku isima ikaba yarakiraga abarenga 3000.

Petit stade izakinirwaho imikino ibiri ya kamparampaka ‘BetPawa Playoffs’ 2024, hagati ya Patriots BBC, Kepler BBC, APR BBC na REG BBC.

Ni imikino ikinwa isiga hamenyekanye ikipe yegukanye igikombe cya shampiyona y’icyiciro cya mbere mu Rwanda.

Ni imikino ibiri iteganyijwe kuri uyu wa Gatanu tariki 30 Kanama 2024, aho Patriots BBC izakira Kepler BBC guhera ku isaha ya Saa Kumi n’ebyiri z’umugoroba (18h00′).

Naho ku isaha ya Saa Mbili n’igice z’ijoro (20h30′), APR BBC ikazakira REG BBC.

Muri aya makipe uko ari 4 azakina imikino ya kamparampaka ‘BetPawa Playoffs’ 2024, azakina imikino itanu muri ½, ikipe itsinze itatu ya mbere izahita igera ku mukino wa nyuma.

‘BetPawa’ isanzwe ari umuterankunga w’iy’imikino ya kamparampaka izajya ihemba umukinnyi wahize abandi aho azahabwa ibihumbi 2$ bivuye ku 1500 $.

Ni mugihe umutoza n’abakinnyi bazajya batsinda umukino bazajya bahembwa ibihumbi 65 Frw kuri mukino.