APR BBC na Patriots BBC zakatishije itike yo gukina imikino ya nyuma ya ‘BetPawa Playoffs’ 2024

Ikipe ya APR BBC na Patriots BBC nizo zakatishije itike yo kuzakina imikino ya nyuma ya kamparampaka ‘BetPawa Playoffs’ 2024, nyuma y’uko zibonye intsinze eshatu muri itanu zisabwa muri ½ kugira ngo ukomeze mu kindi cyiciro.

APR BBC yasezereye REG BBC bari bahanganye iy’itsinze imikino 3-0, mu gihe Patriots yasezereye Kepler BBC nayo iy’itsinze imikino 3-0, zihita zikatisha itike yo gukina umukino wa nyuma.

Iyi mikino yabaye ku mugoroba wo kuri uyu wa Gatandatu tariki 4 Nzeri 2024, muri Petit Stade yavuguruwe.

Ni imikino yitabiriwe n’abayobozi batandukanye barimo Minisitiri wa Siporo Nyirishema Richard, Umuyobozi wa NBA Afurika Clare Akamanzi, ndetse na Perezida w’ishyirahamwe rya Basketball mu Rwanda Mugwiza Desire.

REG BBC na Kepler BBC zasabwaga gutsinda umukino wa gatatu kugira ngo bakomeze gukina indi mikino, ibintu byari bigoye.

REG BBC yongeye gutakaza umukino wa gatatu itsinzwe amanota 66-61 APR BBC igera ku mukino wa nyuma.

Mu mukino wari wabanje wari wahuje Patriots BBC na Kepler BBC warangiye Patriots BBC itsinze Kepler BBC amanota 89-66 yuzuza intsinzi eshatu ziyigeza ku mukino wa nyuma.

APR BBC ifite Igikombe giheruka cya 2023 na Patriots BBC ifite igikombe cya 2020 zizahurira ku mukino wa nyuma, aho umukino wa mbere uteganyijwe tariki 11 Nzeri muri BK Arena.

Hazakinwa imikino irindwi gusa ikipe itanga indi gutsinda imikino ine izegukana igikombe ndetse ikatishe tike yo gukina imikino ya BAL.