Umwongereza Krumesh Patel yagizwe umutoza wa REG WBBC

Ikipe ya REG WBBC yasinyishije umutoza mushya w’umwongereza Krumesh Patel ugiye kuyifasha mu mikino ya Super Cup na ‘BetPawa Playoffs’ 2024.

Nk’uko byemejwe n’ubuyobozi bw’ikipe ya REG WBBC bwatangaje ko uyu mutoza ari bugere i Kigali kuri uyu wa Kane tariki 5 Nzeri 2024.

Imikino ya Super Cup irimo kugana ku musozo iteganyijwe gusoza hagati ya tariki 18-20 Nzeri 2024.

Ni mugihe imikino ya kamparampaka ‘BetPawa Playoffs’ 2024, itanga igikombe cya shampiyona iteganyijwe gutangira tariki 28 Nzeri 2024.

REG WBBC yarisanzwe itozwa n’umutoza Mukaneza Esperance.

Krumesh Patel w’imyaka 34 y’amavuko yabaye umutoza wigaragaje uyu mwaka 2024, akaba yaregukanye igikombe Nyafurika, Patel kandi yabaye umutoza mwiza wa 2022-23 muri shampiyona y’Ubwongereza ubwo yatozaga ikipe ya Leicester Riders aho yari ahanganye mu makipe y’imbere.

Uyu mutoza kandi mu mwaka 2023-24 yari umutoza wungirije mu ikipe ya London Lions y’abagore yatwaye igikombe cya Euro itsinze ku mukino wa nyuma Besiktas yo muri Turikiya.

Krumesh Patel ufite uburambe mu butoza, niwe watoje ikipe y’igihugu y’Ubwongereza y’abagore y’abatarengeje imyaka 18 mu mwaka 2024, kimwe no mu mwaka wa 2023 aho yabaye umutoza w’ikipe y’igihugu y’Ubwongereza y’abatarengeje 20, ndetse muri uwo mwaka akaba ari nawe warufite ikipe y’igihugu y’Ubwongereza y’abagore y’abatarengeje 23 mu irushanwa rya 3×3.

Mbere yaho mu mwaka 2020-22 yatozaga ikipe ya Wetterbygden Sparks yo muri Sweden.