APR BBC yazukiye ku mwuka wa nyuma yatsinze Patriots BBC bigoranye mu mikino ya nyuma ya ‘BetPawa Playoffs’

APR BBC yatangiye neza, mu mukino kabiri yarihanganyemo na Patriots BBC muri ‘BetPawa Playoffs’ byarangiye muri uyu mukino hiyambajwe iminota itanu y’inyongera, kuko uduce 4 tugize umukino utari woroshye twarangiye amakipe yombi anganyije amanota 86-86.

Ni umukino wabaye ku mugoroba wo kuri uyu wa Gatanu, tariki 13 Nzeri 2024, muri BK Arena ahari hakubise abafana baya makipe yombi.

Umukino wa mbere wa kamparampaka ‘BetPawa Playoffs’ uyu mwaka Patriots BBC yawutsinze APR BBC ku manota 83-71.

APR BBC yatangiye umukino neza itsinda amanota menshi ibifashijwemo na Axel Mpoyo watsindaga amanota atatu menshi na Isaiah Miller.

Agace ka mbere karangiye APR BBC iyoboye umukino n’amanota 30 kuri 18 ya Patriots BBC

Mu gace ka kabiri, ikipe y’ingabo yakomeje kongera amanota ibifashijwemo na Alioum Diarra na Axel Mpoyo batsindaga cyane.

Ako gace karangiye APR BBC ikomeje kuyobora umukino n’amanota 57 kuri 35 ya Patriots.

Mu gace ka gatatu, Patriots yagarukanye imbaraga itangira kugabanya amanota ibifashijwemo na Stephaun Branch na Ndizeye Dieudonné batsindaga amanota atatu bagatsindamo amanota 27-17 ya APR BBC.

APR BBC yari yatangiye yizeye intsinzi yatunguwe no kwisanga bayigaranzuye mu gace ka Kane, ikipe ya Patriots BBC yayigaruje kugeza ubwo batsinzemo amanota 24 kuri 12 ya APR BBC.

Uduce tune tugize umukino turangira amakipe yombi anganyije amanota 86-86.

Ibi byatumye muri uyu mukino hiyambazwa iminota 5 y’inyongera kugira amakipe yombi yisobanure, APR BBC yahumekaga amasigamana, yaje kwikora mu nda kugira ngo isibe amakosa yari yakoze, niko kwikosora ibifashijwemo na Axel Mpoyo na Diarra batsindaga amanota ayifasha kubona intsinzi. Ni iminota APR BBC yatsinzemo amanota 15 kuri 7 ya Patriots BBC wabonaga ko yahise irangwa n’amakosa no kudahuza neza ku bakinnyi bayo.

Umukino wa kabiri mu mikino ya nyuma ya ‘BetPawa Playoffs’, urangira APR BBC itsinze amanota 101 ku 93 Patriots BBC.

Ibi bivuze ko hagomba gukinwa umukino wa gatatu, kuko amakipe yombi anganya intsinzi 1-1, mu ruhererekane rw’imikino irindwi mugihe izatsinda ine ya mbere ariyo izahabwa igikombe cya shampiyona cy’uyu mwaka 2024.

Umukino wa gatatu, uzaba ku cyumweru tariki 15 Nzeri 2024, muri Bk Arena guhera ku isaha ya Saa Kumi n’ebyiri z’umugoroba (18h00).