Rayon Sports y’Abagore yakuye mu isoni basaza babo yegukana igikombe cya ‘Super Cup’-AMAFOTO

Kuri uyu wa Kane tariki 26 Nzeri 2024, Rayon Sports y’Abagore yegukanye igikombe kiruta ibindi ‘Super Cup’ inyagiye As Kigali y’Abagore ku bitego 5-2.

Ni umukino wabereye kuri Kigali Pele Stadium, guhera ku isaha ya Saa Kumi z’umugoroba 16h00.

Rayon Sports yinjiye mu kibuga ishaka iki gikombe kibanziriza shampiyona y’icyiciro cya mbere mu Rwanda, yatsinze irusha bikomeye mu kibuga hagati ibifashijwemo n’abakinnyi bayo ikipe ya As Kigali.

Ku munota wa 11 w’umukino Rayon Sports WFC yari yinjiye mu mukino yatsinze igitego cya mbere cyatsinzwe na Gibi Marry CHAVINDA ukomoka muri Malawi.

Gusa bidatinze, ikipe ya As Kigali Women Fc yaje gukanguka itangira gutambaza umupira mu kibuga ibifashijwemo n’abakinnyi bayo barimo Iradukunda Calixte na Nguema Odette baje gutsinda ibitego bibiri byihuse igice cya mbere kirangira As Kigali y’Abagore iyoboye n’ibitego 2-1 cya Rayon Sports WFC.

Mu gice cya kabiri, Rayon Sports y’Abagore yaje igabanya amakosa yari yakoze mu gice cya mbere, itangira guhererekanya neza umupira ari nako yohereza kuri ba rutahizamu bayo.

Umunya-Malawai Mary Chavinda Gigi nawe yirinze gukora ikosa atsinda igitego cya kabiri, Rayon Sports iba iranginyije gutyo.

Rayon Sports WFC yakomeje gusatira izamu rya As Kigali y’Abagore itari yorohewe Rachel Muema na Khadidja Muhawenimana baje kwinjiza ibindi bitego 2 mbere y’uko iminota 90 y’umukino igera.

Mu minota y’inyongera, Rayon Sports y’Abagore yaje gutsindirwa igitego cya gatanu na Jeaninne Mukandayisenga ‘Kaboy’, umukino urangira As Kigali y’Abagore inyagiwe ibitego 5-2.

Rayon Sports y’Abagore yegukanye igikombe kiruta ibindi ‘Super Cup’, ikaba ibimburiye basaza babo (Rayon Sports) gutwara igikombe idaheruka.