Abanyeshuri biga mu mashuri abanza bashyizwe igorora mu gitaramo cya ‘Unveil Africa Fest’

Abanyeshuri biga mu mashuri abanza bahawe umwihariko udasanzwe wo kuzinjirira ubuntu mu gitaramo cya ‘Unveil Africa Fest’ giteganyijwe kuwa gatandatu tariki 7 Ukuboza 2024, muri Camp Kigali.

Ibi n’ibyatangajwe n’abarimo gutegura iki gitaramo mu kiganiro bagiranye n’itangazamakuru cyabaye kuri uyu wa 3 Ukuboza 2024, kuri Onomo Hotel.

Aho bavuze ko batekereje ku bana bakiri bato bazaba baherekeje ababyeyi babo bazaba bitabiriye icyo gitaramo kuko batazishyuzwa, dore ko n’igitaramo ubwacyo kizaba kirimo abahanzi bato bazataramira abakuru.

Mugabo Julius urimo gutegura iki gitaramo yagize ati “Igitaramo cyacu kizaba abanyeshuri biga mu bigo by’amashuri bataraza, ahubwo icyo twakoze twatekereje ku batarajya mu bigo by’amashuri cyangwa abiga bataha, ubwo ni mu mashuri abanza, ababyeyi bazazana n’abana babo biga mu mashuri abanza bazaba babaherekeje mu buryo bw’umutekano wabo ntabwo tuzabishyuzwa.”

‘Unveil Africa Fest’ ni igitaramo ngarukamwaka abagiteguye bavuga ko bahisemo ku gitegura mu buryo bwo gutwikurura Afurika mu buhanzi biciye muri gakondo kikaba kibaye ku nshuro ya mbere gusa bakaba batekereza ko cyazaba kiba ngarukamwaka kandi kigakorwa mu bihugu bitandukanye bya Afurika.

Ni iserukiramuco riteganyijwe kuzaririmbamo abahanzi nka Ruti Joel, Victor Rukotana, Itorero Intayoberana, itsinda ry’ababyinnyi rya Himbaza Club, Chris Neat, itsinda ry’abakobwa b’impanga rizwi nka J_Sha, Félix Siboyintore.

Iki gitaramo kizayoborwa n’umunyamakuru akaba n’umushyushyarugamba Lucky man Nzeyimana.

Abahanzi bose batumiwe kuzataramira muri ‘Unveil Africa Fest’ bavuze ko biteguye neza kandi bijeje abazacyitabira kuzataramana nabo bigatinda.

Itsinda ry’abakobwa b’impanga rizwi nka J_Sha bavuze ko batahita bahishura icyo bazabitegaho ahubwo ari agaseke bahishiye abazitamira igitaramo.

Umwe mu bagize itsinda ati “Nkatwe nka J_Sha turumva aribwo tuzaba tugiye gutaramira ahantu hagutse kuri uriya munsi, icyo bakwitega ntabwo nahita nkibabwira aka kanya ahubwo ndabatumiye mbahaye karibu muzaze mubirebe.”

Ku ruhande rw’umuhanzi Chris Neat uzwi ku izina rya ‘Inzobe idahanda’ we yavuze ko urebye iminsi bamaze bitegura ntakindi cyo kwitega uretse kuzasusurutsa abazaba bitabiriye igitaramo.

Ati “Twakoze imyitozo ihagaje hamwe n’Inama rero turabizeza kuzabona ibyo mutigeze mubona dukora.”

Umuyobozi w’itorero Intayoberana Kayigemera Sangwa Aline  ati “Mu magambo ni umwimere, ubudasa bw’u Rwanda nibyo itorero Intayoberana rizabataramira.”

Félix Siboyintore ucuranga inanga gakondo avuga henshi yataramye, yiteguye gutaramira abazitabira iki gitaramo bigatinda.

Arsene waje ahagarariye Himbaza Club we yavuze ko nyuma y’uko benshi bagiye babona hirya no hino mu bitaramo bitandukanye byo mu Karere duherereyemo, biteguye gutanga ibyishimo babinyujije mu gukoma ingoma bizeye neza ko zizaryohera kubazaba bitabiriye iki gitaramo.”

Kugeza kuri ubu amatike yatangiye kugurishwa binyuze bikaba biri mu byiciro bitatu aribyo: Kalisimbi igura ibihumbi 50 Frw, Muhabura igura ibihumbi 25 Frw, na Bisoke igura ibihumbi 10 Frw.

Ukaba ushobora kugura itike yawe unyuze ku rubuga rwa https://www.noneho.com/