Abayobozi bakuru mu nzego za gisirikare basuye APR Fc bayiha ubutumwa mbere y’uko bahura na Police Fc-AMAFOTO

Ku gicamunsi cyo kuri uyu wa kabiri tariki ya 3 Ukuboza 2024 abayobozi bakuru basuye ikipe y’Ingabo z’Igihugu, aho isanzwe ikorera imyitozo i Shyorongi mu Karere ka Rulindo mbere y’uko bahura na Police mu mukino wa Derby y’umutekano.

Abo bayobozi bari barangajwe imbere n’Umugaba Mukuru w’Ingabo zirwanira ku butaka, Maj. Gen Vincent Nyakarundi wari kumwe n’Umugaba Mukuru w’Inkeragutaba Maj.Gen Alex Kagame ndetse na Chairman wa APR Fc , Brig. Gen Deo Rusanganwa.

Ubwo basuraga iyi kipe y’Ingabo, abo bayobozi bakurikiranye imyitozo yakoraga, maze nyuma bafata umwanya baganiriza abakinnyi n’abatoza.

Mu butumwa babagejejeho, abayobozi babwiye abakinnyi n’abatoza ko babari inyuma mu mikino iri imbere uhereye ku wo bafite kuri uyu wa Gatatu n’ikipe ya Police Fc kuri uyu wa Gatatu tariki 4 Ukuboza 2024, kuri Kigali Pele Stadium ndetse n’uwo kuwa gatandatu tariki ya 7 Ukuboza 2024.

Imyitozo aba bayobozi bakurikiye kugeza irangiye abakinnyi bayikoranye akanyamuneza, dore ko banatsinze umukino uheruka bari bakiriwemo na AS Kigali, ku ntsinzi y’igitego 1-0, ibyo binatanga icyizere cyo kwitwara neza muri uwo mukino bagomba gukina na Police Fc ku gicamunsi cyo kuri uyu wa Gatatu.

Kapiteni w’ikipe ya APR Fc, Niyomugabo Claude nawe yashimiye ubuyobozi budahwema kubaba hafi muri byose yizeza intsinzi ku buyobozi n’abafana muri rusange kuri uyu mukino utoroshye bazakina muri Derby y’umutekano.

APR Fc irasubira mu kibuga kuri uyu wa Gatatu aho izaba ihura na Police F.C, umukino ukazabera kuri Kigali Pele Stadium guhera saa Cyenda z’amanywa 15h00.

Ni mugihe kuwa gatandatu, bazahita bakurikizaho umukino ukomeye bakirwa na Rayon Sports kuri Stade Amahoro guhera Saa Kumi n’ebyiri z’umugoroba 18h00.