RDC: Abasirikare bakomeye bashinjwe guhunga urugamba ubwo M23 yafata Goma baburanishijwe

Urukiko Rukuru rwa gisirikare i Kinshasa muri Repubulika ya Demokarasi ya Congo ku wa kane rwatangiye kuburanisha abasirikare n’abapolisi bakuru batanu bashinjwa guhunga urugamba ubwo umutwe wa M23 wari ugiye gufata umujyi wa Goma.

Aba basirikare n’abapolisi bose bo ku rwego rwa jenerali, bakoranaga bya hafi na Gen. Maj. Peter Cirimwami wari Guverineri wa gisirikare wa Kivu ya Ruguru – wishwe arashwe hafi yo Mubambiro mu burengerazuba bwa Goma – mbere y’uko uyu mujyi ufatwa.

Abasirikare baregwa ni;

General Major Alengbia Nzambe wari komanda wa 34ème ’region militaire’ muri Kivu ya RuguruGeneral de Brigade Danny Tene Yangba wari umujyanama mukuru wa Guverineri wa gisirikare ku by’umutekanoBrigadier General Papy Lupembe, wari komanda wa Brigade ya 11 yagenzuraga inzira ya Sake – Kitchanga, muri Kivu ya Ruguru

Abapolisi baregwa ni;

Jean-Romuald Ekuka Lipopo, wari Guverineri wa polisi wungirije wa Kivu ya RuguruEddy Mukuna, wari Komiseri wungirije wa polisi muri iyo ntaraBose bashinjwe ubugwari bwo guhunga Goma mu bwato bwite basize ingabo bayoboraga ku rugamba ubwo Goma yafatwaga.

Ubushinjacyaha bwavuze ko ibyo byateye gutakaza ibikoresho bya gisirikare n’imyitwarire mibi y’abo bari bayoboye ku rugamba.

Ku munsi wa mbere w’urubanza, basomewe imyirondoro yabo, bamenyeshwa n’ibyo baregwa ariko ntibahawe umwanya wo kwiregura.

Urubanza rwabo rwatangiye hari Minisitiri w’ubutabera wa DR Congo, Constant Mutamba, ari na we watangaje ko bagiye kuburanishwa.

Aba basirikare n’abapolisi bafungiye muri gereza ya gisirikare ya Ndolo i Kinshasa.

Ababunganira mu mategeko bavuze ko bafunze mu buryo bubi, basaba ko bafungurwa bagakurikiranwa badafunze.

Urubanza rwabo rwaciye kuri televiziyo y’igihugu kuri uyu munsi warwo wa mbere, ariko urukiko rwa gisirikare rwatangaje ko igice gisigaye cyarwo kizaburanishwa mu muhezo mu kwirinda kumena amabanga ya gisirikare.

Mu gihe umutwe wa M23 ukomeje kwigarurira ibice bimwe na bimwe mu ntara za Kivu ya Ruguru na Kivu y’Epfo, ingabo za DR Congo n’abazikuriye banengwa guhunga bagata inyuma intwaro, amasasu, n’abasirikare bakomeretse.

Mu mpera z’ukwezi gushize, abasirikare 55 bakatiwe urwo gupfa n’urukiko rwa gisirikare rwa Butembo muri Kivu ya Ruguru, bahamijwe ibyaha by’ubugwari bwo guta urugamba, gusahura abaturage no guta intwaro zabo.

Mbere gato y’ifatwa ry’umujyi wa Bukavu mu kwezi gushize, abasirikare barenga 80 ba FARDC hamwe na Wazalendo bariho baburanishwa ku byaha byo guhunga M23, gusahura abaturage no kwica bahamijwe ibyaha.

Urukiko rwa gisirikare i Bukavu rwabakatiye urwo gupfa, M23 isatiriye uwo mujyi abategetsi n’abasirikare bo muri uyu mujyi na bo bahise bahunga.

Abategetsi bavuga ko mu batorotse gereza ya Bukavu ubwo M23 yafataga uyu mujyi, harimo n’abo basirikare bari bakatiwe urwo gupfa.