Basketball: Imikino yo Kwibuka31 igeze aharyoshye
Kuri uyu wa Gatanu, tariki 25 Mata 2025, hateganyijwe imikino ine y’irushanwa ryo Kwibuka ku nshuro ya 31 Jenoside yakorewe Abatutsi iri bubera muri Petit Stade.
Ni imikino ine ihera mu bagore, aho ikipe ya APR WBBC yakira ikipe ya KPA WBBC yo muri Kenya naho REG WBBC ikaza gukinana na JKL Dolphins Sports Club yo muri Uganda.
Iyi mikino irakomeza no mu bagabo aho Patriots BBC izakwakira Dar City BBC yo muri Tanzania, naho APR BBC ikaza guhura na REG BBC mu mukino uteganyijwe ku isaha ya Saa Tatu z’ijoro.
APR WBBC iraza guhura na KPA WBBC, ishaka intsinzi ya kabiri, dore ko umukino wa mbere wabahuje na Kepler WBBC warangiye itsinze amanota 58-55.
Ni mugihe ikipe ya REG WBBC nayo igiye gukina umukino wa kabiri na JKL Dolphins Sports Club kuko mu mukino wayo wa mbere, yisasiye ikipe ya EAUR WBBC iy’itsinda amanota 104 kuri 50.
Mu bagabo, ikipe ya REG BBC yari yatsinzwe umukino wayo wa mbere na KPA amanota 58-55, iraba ishaka intsinzi ya mbere muri aya marushanwa yo Kwibuka ku nshuro ya 31 Jenoside yakorewe Abatutsi mu Rwanda.
APR BBC yaraye itsinze KPA amanota 99-61, iragaruka mu kibuga yesurana na REG BBC iheruka gutsindwa ku isaha ya Saa Tatu z’ijoro.
Ni mugihe umukino wa Patriots BBC irajya mu kibuga ishaka gutsinda ikipe Dar City BBC ariwo ubanza ku isaha ya Saa Kumi n’ebyiri n’Igice z’umugoroba kugira ngo yizere urugendo rukomeza muri aya marushanwa kuko umukino wa mbere yari yawutakaje ihura na UGB BBC.
Ni imikino ikomeje kubera muri Petit Stade, ahari kubera irushanwa ryo Kwibuka ku nshuro ya 31 Jenoside yakorewe Abatutsi, abahoze ari abakinnyi, abatoza n’abakunzi b’uyu mukino bishwe muri Jenoside.
