Kenya: Depite Charles Ong’ondo Were yishwe arashwe n’abagendaga kuri Moto

Depite mu Nteko Ishinga Amategeko ya Kenya, Charles Ong’ondo Were, yishwe arasiwe mu Mujyi wa Nairobi ku mugoroba wo kuwa Gatatu tariki 30 Mata.

Aya makuru kandi yatangajwe n’ibindi bitangazamakuru byo muri Kenya, birimo The Nation hamwe n’ikinyamakuru The Standard.

Uyu mudepite, Charles Ong’ondo Were, uhagarariye intara ya Kasipul mu burengerazuba bwa Kenya, yarashwe ahagana mu ma saa moya n’igice z’umugoroba ku isaha yaho “n’abantu bitwaje imbunda bamukurikiranaga bari kuri moto”, nk’uko byatangajwe na Citizen TV.

Umwe mu bantu bitwaje imbunda yavuye kuri moto maze arasa Were amwegereye, nk’uko byatangajwe na Citizen TV, ikomeza ivuga ko umushoferi we yarokotse iraswa.

Uyu mudepite yatangajwe ko yapfiriye mu bitaro aho yari yahise ajyanwa kwivuza.

Were yari umwe mu bayoboke b’ishyaka rya ODM ritavuga rumwe n’ubutegetsi riyobowe n’umunyapolitiki w’inararibonye Raila Odinga, watsinzwe na William Ruto mu matora aheruka mu 2022.

Odinga wanze ibyavuye mu matora, avuga ko yabayemo uburiganya, kuva icyo gihe yagiranye amasezerano na Ruto kugira ngo bakemure ibibazo bibangamiye Kenya.