Karol Nawrocki yatsinze amatora yo kuyobora Pologne

Karol Nawrocki ukomeye ku mahame y’umuco gakondo, yatsinze amatora ya Perezida muri Pologne, ahigitse Rafal Trzaskowski usanzwe ari Meya wa Warsaw, mu cyiciro cya kabiri cy’amatora cyabaye ku Cyumweru.

Bikubiye mubyo Komisiyo y’Igihugu y’Amatora yatangaje aho yemeje ko Nawrocki yagize amajwi 50,89%, mu gihe Trzaskowski yagize 49,11%.

Abitabiriye amatora bari 71,63%, biba bimwe mu bipimo byo hejuru by’ubwitabire mu matora bibayeho muri icyo gihugu. Trzaskowski yagize amajwi menshi cyane mu mijyi minini, naho Nawrocki atsinda cyane mu byaro no mu bantu bakuze.

Ni ku nshuro ya kabiri yikurikiranya Trzaskowski atsinzwe mu matora y’Umukuru w’Igihugu kuko yaherukaga gutsindwa na Andrzej Duda.

Nawrocki, ushyigikiwe n’ishyaka ritavuga rumwe n’ubutegetsi rya Law and Justice (PiS), yiyamamarije ku nkingi z’indangagaciro za gikirisitu, ubusugire bw’igihugu no kongera kugenzura umubano wa Pologne n’Ubumwe bw’u Burayi.

Ni mu gihe, Trzaskowski watsinzwe muri aya matora yari mu bayobozi bakuru b’ihuriro rya Minisitiri w’Intebe, Donald Tusk, ryitwa Civic Coalition. Mu byo yari ashyize imbere harimo gushyigikira umubano ukomeye na EU, kuvugurura ubutabera, koroshya amategeko abuza gukuramo inda no gushyiraho ishingiro ry’amasezerano y’abaryamana bahuje ibitsina (LGBTQ).

Abakandida bombi bari basezeranyije kongera ingengo y’imari ishorwa mu mutekano. Bombi kandi bashyigikiye gukomeza guha Ukraine inkunga, ariko Trzaskowski yagaragaje ko ashyigikiye ko Ukraine yinjira muri NATO, avuga ko ari ingenzi ku mutekano wa Pologne., mu gihe Nawrocki we yavuze ko atazemeza ibyo, aburira ko byakurura intambara ya NATO n’u Burusiya.

Nawrocki, utari usanzwe muri politiki, yayoboraga Ikigo cy’Igihugu cy’Ubushakashatsi ku Mateka (Institute of National Remembrance), gifite inshingano zo kwamamaza amateka ya Pologne no gukora iperereza ku byaha byakorewe mu gihugu mu gihe cy’ubutegetsi bw’Abanazi n’icy’ubutegetsi bwa gikominisiti.

Mu minsi ishize yahuye Perezida wa Leta Zunze Ubumwe za Amerika, Donald Trump, muri White House, aramubwira ati “uzatsinda.”