Ayra Starr yongewe mu byamamare bizaririmba muri ‘Giants Of Africa’ izabera i Kigali

Sarah Oyinkansola Aderibigbe wamamaye nka Ayra Starr yongewe mu byamamare bizaririmba mu iserukiramuco rya ‘Giants Of Africa’ izabera i Kigali.

Ayra Starr yiyongereye mu bahanzi bazaririmba mu gitaramo kizaherekeza iserukiramuco rya ‘Giants Of Africa’ rizaba kuwa 2 Kanama 2025, muri Bk Arena.

Iri serukiramuco rizaba hafi icyumweru cyose rikazaberamo ibikorwa bitandukanye birimo imikino, imyidagaduro, umuco n’ibindi bihuza abantu muri rusange aho bizatangira tariki 26 Nyakanga 2025.

Tariki 27 Nyakanga 2025, mu nyubako ya Bk Arena hazabera igitaramo cyo gufungura ku mugaragaro iserukiramuco rya ‘Giants Of Africa’, abahanzi barimo Ruti Joel, Chriss Eazy, Boukuru, Kevin Kade, Alyn Sano, umubyinnyi mpuzamahanga Sherrie Silver ndetse na Uncle Waffles umuvanzi w’imiziki wamenyekanye mu njyana ya Amapiano akaba akomoka muri Eswatini n’abandi.

Umuhanzikazi Ayra Starr umaze kubaka izina mu muziki by’umwihariko muri Afurika we azaririmba mu gitaramo giteganyijwe ku wa 2 Kanama 2025, ahaza harimo abandi nka The Ben, Kizz Daniel na Timaya mu birori byo gusoza iri serukiramuco rya Giants of Africa.

Ayra Starr ukomoka mu gihugu cya Nigeria akaba afite imyaka 23 yongewe muri iri serukiramuco nyuma y’uko amaze kuba kimenywabose kubera ubuhanga mu buhanzi bwe biturutse mu ndirimbo ze zakunzwe zirimo nka ‘Rush’ imaze kurebwa n’abarenga miliyoni 400 ku rubuga rwa YouTube, ‘Commas’, ‘Sability’, ‘Rhythm & Blues’ n’izindi nyinshi.

Giants of Africa isanzwe ifasha urubyiruko rwa Afurika kugaragaza impano zitandukanye by’umwihariko mu mukino wa Basketball, igitekerezo cyatekerejwe na Masai Ujiri, Umunya-Nigeria wayoboye Toronto Raptors yo muri NBA, nyuma yo kubona ko Abanyafurika badahabwa amahirwe n’amakipe akomeye kubera kutagira ibikorwaremezo bituma berekana impano zabo.

Iri serukiramuco rigiye kubera i Kigali guhera tariki 26 Nyakanga kugeza 2 Kanama 2025, rizahuza abarenga 320 bazaba baturutse mu bihugu bisaga 20 ku mugabane wa Afurika harimo kandi n’abandi bazitabira ibikorwa birimo imikino, imyidagaduro, umuco n’ibindi bihuza abantu bagera ku bihumbi 20.

Uretse kandi Ayra Starr wongewe mu bazagaragara mu iserukiramuco rya ‘Giants Of Africa’ hari kandi Kawhi Leonard usanzwe akinira Los Angeles Clippers muri NBA uri mu bashyitsi b’imena, Didier Drogba n’abandi.

Ubwo iri serukiramuco riheruka kuba mu mwaka 2023 ryari ryahujwe no kwizihiza imyaka 20 uyu muryango umaze ushinzwe, aho ryitabiriwe n’urubyiruko rurenga 250 rwari rwaturutse mu bihugu 16 byo ku Mugabane wa Afurika birimo Sénégal, Mali, Nigeria, Cameroun, Repubulika Iharanira Demokarasi ya Congo, Sudani y’Epfo, Uganda, u Rwanda, Tanzania, Kenya na Somalia.

Kugeza kuri ubu amatike yo kwitabira ibyo bitaramo byombi yamaze kujya hanze, aho ushobora kuyagura unyuze ku rubuga rwa Ticqet.rw.