Dosiye ya Kalisa Adolophe wari Umunyamabanga wa FERWAFA yamaze kugezwa mu bushinjacyaha

Urwego ry’Igihugu rw’Ubugenzacyaha, RIB, rwatangaje ko dosiye ya Kalisa Adolophe uzwi cyane ku izina rya Camarade, wahoze ari umunyamabanga Mukuru wa FERWAFA yamaze kugezwa mu bushinjacyaha.

Uru rwego ku munsi w’ejo nibwo rwatangaje ko rwataye muri yombi Kalisa Adolphe Camarade wari Umunyamabanga Mukuru wa FERWAFA na Tuyisenge Eric “Cantona” ushinzwe ibikoresho mu Amavubi.

Mu kiganiro na RBA, Umuvugizi wa RIB, Dr Murangira B Thierry, yavuze ko yatawe muri yombi tariki ya 4 Nzeri 2025 ariko dosiye ye ishyikirizwa ubushinjacyaha tariki ya 9 Nzeri 2025.

Aba bombi bakurikiranyweho ibyaha bitatu birimo icyaha cyo gukoresha inyandiko mpimbano, icyo gusaba cyangwa gutanga indonke ndetse n’icyo kunyereza umutungo.

RIB ivuga ko iperereza ry’ibanze rigaragaza ko hari impamvu zikomeye zituma bakurikiranwa ku byaha bakekwaho.

Umuvugizi wa RIB, Dr Murangira B Thierry yasabye abategura amarushanwa yo muri siporo kwitwararika

Agira ati” Buriya iyo hari umuntu wakurikiranywe mu butabera, biba bigomba guha isomo abantu batandukanye. Isomo baba bagomba gukura ku gufungwa ku muntu cyane muri Siporo, ni ukumva ko Siporo muri rusange atari ikirwa ku buryo ukuboko k’ubutabera kutahagera.

Igihe cyose hari igikorwa kigize icyaha bihakorerwa, RIB ifite ububasha ndetse n’inshingano zo kubikurikirana, abo ibimenyetso bigaragaye bagakurikiranwa mu butabera.”

RIB yasabye kandi abategura amarushanwa abera mu Rwanda no hanze y’igihugu kuyategurana ubunyangamugayo, birinda ibyaha birimo kunyereza umutungo n’ibindi, kuko ari ibyaha bidasaza.

Ingingo ya 10 y’itegeko ryerekeye kurwanya ruswa n’icyaha cyo kunyereza umutungo ritegeka ko umuntu wese uhamijwe n’urukiko ibi byaha ahanishwa igifungo kiri hejuru y’imyaka irindwi ariko kitarenze imyaka 10 ndetse n’ihazabu y’amafaranga y’u Rwanda yikubye inshuro kuva kuri eshatu kugera kuri eshanu z’agaciro ku mutungo wanyerejwe.

Ku cyaha cyo kwakira indonke, riteganywa n’ingingo ya kane yerekeye kurwanya ruswa, aho ugihamijwe n’urukiko ahanishwa igifungo kiri hagati y’imyaka itanu n’imyaka irindwi ndetse hakiyongeraho n’ihazabu y’amafaranga yikubye inshuro kuva kuri eshatu kugera kuri eshanu z’agaciro ki ndonke yakiriwe.

Ni mu gihe icyaha aba bakozi ba FERWAFA bakurikiranyweho kirimo guhimba cyangwa gukoresha inyandiko mpimbano, riteganywa n’ingingo ya 276 y’itegeko riteganya ibyaha n’ibihano muri rusange, uwabikoze akabihamwa n’urukiko ahanishwa igifungo kiri hagati y’imyaka itanu n’itandatu n’ihazabu y’amafaranga ari hagati ya miliyoni eshatu na eshanu.