BK Arena izatangiriramo Shampiyona y’Isi y’Amagare ku nshuro ya mbere itangiriye imbere mu nyubako

Inyubako y’imikino n’imyidagaduro ya BK Arena igiye gukora amateka yo gutangiriramo Shampiyona y’Isi y’Amagare ku nshuro ya mbere izaba itangiriye imbere mu nyubako.

Bigiye akuba u Rwanda ruri kwakira iya 2025 izatangira ku Cyumweru tariki 21 Nzeri 2025.

Iyi nyubako iherereye i Remera mu Mujyi wa Kigali isanzwe yakira imikino ikinirwa mu nzu ndetse n’ibitaramo bitandukanye, yiteguye kwakira no gukora aya mateka ku munsi wa mbere w’iyi shampiyona ku nshuro yayo ya mbere muri Afurika, aho izatangiriramo icyiciro cy’aho abakinnyi bazasiganwa n’isaha buri wese ku giti cye.

Biteganyijwe ko muri iyi nyubako ku Cyumweru saa yine n’iminota 10 za mu gitondo izabanza guhagurukirwamo n’abagore bakuze aho bazasiganwa intera y’ibilometero 31,2 bagasoza saa sita n’iminota 55 mu gihe saa saba n’iminota 45 abagabo bakuru nabo bazatangira gusiganwa n’isaha buri wese ku giti cye aho bazasiganwa kilometero 40,6.

Iyi shampiyona ibereye muri Afurika ku nshuro ya mbere ikaba ibereye mu Rwanda, izitabirwa n’abakinnyi 919 bavuye mu bihugu 110 hirya no hino ku Isi izasozwa tariki 28 Nzeri 2025.