Iminsi itatu irashize nta muntu uhitanwe na COVID-19 mu Rwanda

Itangazo rya Minisiteri y’Ubuzima mu Rwanda (Minisante) ryo ku Cyumweru, tariki ya 17 Ukwakira 2021 rivuga ko abanduye COVID-19 ari 17 mu bipimo 11.904 byafashwe mu masaha 24 ashize.

Bikaba bigaragaza ko ubwandu bushya buri kugenda bugabanuka ugereranyije no mu minsi yashize ndetse ubu bugeze ku ijanisha rya 0.1%.

Raporo itangwa na Minisante yerekanye ko kuba nta murwayi wahitanywe na COVID-19 byatumye umubare w’abamaze kwicwa n’iki cyorezo uguma ku 1.313. Umwe ni we winjijwe mu bitaro mu gihe nta wasezerewe nyuma yo gukira.

Kuva Tariki ya 15 Ukwakira 2021 kugeza tariki 17 Ukwakira 2021, nta muntu numwe wayitanwe n’iki cyorezo, abashya banduye mu minsi itatu ni 158.

Igabanuka ry’abandura COVID-19 n’abahitanwa nayo rifitanye isano no kuba umubare munini w’Abatuye mu Rwanda ugenda ukingirwa ibituma abandura baba bake ndetse n’abarwaye ntibarembe cyane ku buryo byabaviramo urupfu.

Kugeza ubu mu Rwanda hamaze gukingirwa mu buryo bwuzuye [ni ukuvuga abahawe dose zombi, barimo 324 bafashe dose ya kabiri uyu munsi] abantu 1.725.362 kuva ibi bikorwa byatangira ku wa 5 Werurwe 2021. Abantu 3.033.940 ni bo bamaze guhabwa dose imwe y’urukingo barimo na 68.557 bayifashe uyu munsi.

Ibimenyetso bya COVID-19 birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.