Perezida Museveni yanduye icyorezo cya COVID-19

Ku mugoroba wo ku wa Gatatu nibwo Umunyamabanga Uhoraho muri Minisiteri y’Ubuzima, Diane Atwine, yavuze ko Perezida Museveni yapimwe agasanganwa Covid-19 nyuma yo kugaragaza ibyo bimenyetso.

Nyuma yo kugaragaza ibimenyetso birimo ibicurane no gucika intege, Perezida wa Uganda, Yoweri Kaguta Museveni, yasuzumwe kuri uyu wa 7 Kamena 2023 basanga yaranduye Covid-19.

Minisitiri Diane avuga ko ngo n’ubwo Perezida Museveni yanduye iki cyorezo, ngo arakomeza gukora imirimo ye nk’ibisanzwe ariko yubahiriza ingamba zo kwirinda kuyikwirakwiza.

Ati “Uyu munsi kuwa 7 Kamena 2023, Nyakubahwa Perezida Museveni yapimwe tumusangamo Covid 19. Arakomeza gukora inshingano ze nk’ibisanzwe mu gihe yubahiriza amabwiriza.”

Ku manywa yo ku wa Gatatu nyuma yo kugeza ijambo ku Nteko Ishinga Amategeko nibwo byatangiye gukekwa ko Museveni yaba yanduye Covid-19, aho yavugaga ko mu gitondo yaramutse yumva afite imbeho, ari naho yahereye asaba ko bamupima Covid-19.

Intumwa ya rubanda, Mattias Mpuuga uyobora ihuriro ry’amashyaka atavuga rumwe n’ubutegetsi bwa Museveni, yahise atanga intabaza ko yifuza ko umuntu wese waba aherutse guhura na Perezida Museveni yapimwa iki cyorezo.

Yanasabye abayobozi bagera ku 2000 barimo abagize Inteko Ishinga Amategeko baherutse kwitabira ijambo rya Museveni kuri uyu wa 7 Kamena 2023, ko bose bagomba gupimwa iki cyorezo cya Covid-19.

Amabwiriza akaze yo kwirinda Covid-19 yakuweho muri Uganda muri Gashyantare 2022.

Ni mugihe kandi mu mezi make ashize Umuryango wita ku Buzima (OMS) uherutse gutangaza ko icyorezo cya COVID-19 kitari mu byorezo bihangakishije Isi.