FIFA yatanze igihe ntarengwa cyo gukemura ikibazo cy’irondaruhu muri ruhago

Perezida w’Ishyirahamwe rya Ruhago ku Isi (FIFA), Gianni Infantino yavuze ko mu mezi atatu ibikorwa by’irondaruhu biri muri ruhago bigomba kuba byashyizweho akadomo, bitewe n’ibihano bikakaye biri gushyirwaho.

Ibi yabitangarije mu Nteko Rusange y’Impuzamashyirahamwe ya Ruhago i Burayi (UEFA) yateranye ku wa 8 Gashyantare 2024, i Paris mu Bufaransa.

Mu ijambo yagejeje ku bitabiriye iyi Nteko Rusange yabaga ku nshuro ya 48, yavuze ko mu nama ya FIFA izateranira mu Thailand muri Gicurasi uyu mwaka, igomba kugera hari imyanzuro yafatiwe ibi bikorwa bidakwiriye muri Ruhago.

Ati “Mu mezi make ashize twabonye ibimenyetso bigaragaza ko irondaruhu rikabije. Ntituzabyemera ukundi, tugomba kubihagarika kandi tugakora ibishoboka byose ngo tubigereho. Irondaruhu ni icyaha. Ni ibintu bibabaje cyane ku buryo tugomba kubihanagura.”

“Mu mezi atatu ari imbere tugomba kuba twashyize hamwe. Mbere y’inama ya FIFA izateranira i Bangkok tariki ya 17 Gicurasi, hari imbaraga tuzaba twashyizemo, twese hamwe tukarwanya ibikorwa by’irondaruhu.”

Infantino yongeyeho kandi ko ashyigikiye ko ahazajya hagaragara irondaruhu runaka, umusifuzi azajya ahita ahagarika umukino.

Nyuma y’ibyo hagomba kujyaho ibihano birimo gukurwaho amanota ku ikipe byagaragayeho, gucibwa amande ndetse no gufatira ibihano byihariye abafana bakoze ibyo bikorwa bigayitse harimo no kwirukanwa burundu ku bibuga.

Ibi abitangaje nyuma y’iminsi hari abakinnyi bakorewe irondaruhu ku buryo bukomeye barimo Kasey Palmer wa Sheffield Wednesday, Vinicius Jr wa Real Madrid, Mike Maignan wa AC Milan, Ivan Toney wa Brentford n’abandi mu bihe bitandukanye.

Mu mpera z’icyumweru gishize kandi umugabo umwe yafunzwe azira gukorera ibi bikorwa Juninho Bacuna wa Birmingham ku mukino iyi kipe yatsinzwemo na West Brom igitego 1-0.