Ruhango: Abanyerondo batemaguwe n’abantu bataramenyekana

Abantu bataramenyekana, bitwikiriye ijoro batemagura abanyerondo bane bacungaga umutekano. Byabereye mu Mudugudu wa Bunyankungu, Akagari ka Mutara, Umurenge wa Mwendo ho mu Karere ka Ruhango.

Abaturage babwiye itangazamakuru ko aba banyerondo baguye mu gico cy’abo bagizi ba nabi ahagana mu gicuku gishyira igitondo cyo kuri uyu wa kabiri, hanyuma bane muri batanu baratemagurwa hakoreshejwe imihoro y’ibigimbe.

Nemeyimana Jean Bosco, Umunyamabanga Nshingwabikorwa w’Umurenge wa Mwendo, yatangaje ko aya makuru ariyo asaba abaturage kwicungira umutekano no gutangira amakuru ku gihe.

Yagize ati “Hatemwe abagabo 4 bari baraye ku irondo, batemaguwe n’abantu bakoresheje imihoro idatyaye bigaragara ko bari bameze nk’abahunga kuko ntabwo babatemaguye ngo babatere inguma zikomeye.”

Abanyerondo batemaguwe bajyanywe ku Kigo Nderabuzima cya Gishweru kugirango bitabweho n’abaganga.