Nel Ngabo yahishuye uko yisanze mu maboko ya Kina Music nyuma y’imyaka myinshi yifuza kuyijyamo

Umuhanzi Nel Ngabo umaze gutanga icyizere mu muziki w’u Rwanda yahishuye uko yisanze mu nzu itunganya umuziki ya Kina Music yashinzwe na Ishimwe Clement, nyuma y’imyaka irenga itandatu amusaba kumufasha.

Rwangabo Byusa Nelson wamamaye nka Nel Ngabo mu muziki ibi yabigarutseho mu kiganiro cyitwa Versus gitambuka kuri televiziyo y’u Rwanda, aho avuga ko kudacika intege aribyo bimugejeje aho amaze kugera.

Ibi byagarutsweho mu kiganiro bari batumiwemo cyo kumurika indirimbo ya Da Rest yakoranye na Nel Ngabo bise ‘Zana’.

Uku kudacika intege yabigarutseho no kuri mugenzi we Da Rest wabarizwaga mu itsinda rya Juda Muzik watangiye urugendo rwo kwikorana nyuma yaho itsinda ryabo risenyutse.

Nel Ngabo avuga ko benshi bakwiriye kumwigiraho ku gucika intege ntaho byageza umuntu.

Yagize ati “Inama nagira abahanzi ni ugukunda akazi. Da Rest arakora cyane kandi iyo ukora kuri urwo rwego ntabwo ibyawe byabura gukunda.”

Uku kudacika intege uyu muhanzi yabihuje n’urugendo rwe muri Kina Music, aho yagaragaje ko na we yandikiye Ishimwe Clement uyobora Kina Music kuva mu 2013 amusaba ko bakorana, ariko ubu butumwa bwe bugasomwa mu 2020 nyuma y’imyaka ibiri uyu muhanzi akorana n’iyi nzu.

Yagize ati “Nakoranye na Clement maze imyaka itandatu mwandikiye kuri Facebook. Rero, inzozi zose waba ufite, jya ukomeza uzikurikirane. Ubwo butumwa [message] mvuga, Clement yabusomye turi kumwe, nari naramwandikiye nk’igitabo buri munsi musaba ko yamfata… icyo gihe n’igaga mu cyiciro rusange cy’amashuri yisumbuye. Yewe nta n’indirimbo nari nakabaye nasohora ariko mubwira ko ndi umuhanzi ukomeye.”

Nel Ngabo w’imyaka 25 yatangiye umuziki mu 2017, gusa impano ye yatangiye kuboneka nyuma yo kwinjira muri Kina Music, ubwo yashyiraga hanze indirimbo ye ya mbere yitwa ‘Nzahinduka’ mu mwaka 2019.

Nel Ngabo yinjiye muri Kina Music yakoranye n’abahanzi batandukanye barimo ‘Christopher’, Knowless usanzwe ari n’umugore wa Ishimwe Clement, iyahoze ari Dream Boyz, Tom Close, n’abandi benshi.

Nel Ngabo yaje gukundwa mu ndirimbo zirimo nka “Nywe”, “Muzadukumbura” yahuriyemo na Fireman, “Zoli”, “Mbali”, “Want you back”, “Mutuale” yahuriyemo na Bruce Melodie, “Babasore” yakoranye na Pfla n’izindi.