Mighty Popo umenyerewe mubya Muzika yatangiye n’urugendo rwa Sinema-AMAFOTO

Muligande Jacques uzwi ku izina na Mighty Popo warusanzwe umenyerewe mubyo kwigisha umuzika yatangiye urugendo rwo kuvungurira ku bumenyi n’ubuhanga afite muri Sinema.

Ku mugoroba wo kuri uyu wa Gatatu tariki 6 Ugushyingo 2024, nibwo Mighty Popo yamuritse filime yise “Killer Music, Chapter 1: Blood Bird, The Saga” ayimurikira abanyamakuru agace gato kazwi nka ‘Trailer’ kagize iyo filime.

Ni filime ivuga ku rugendo rw’abanyamuziki avuga ko yaramaze imyaka myinshi yifuza ko yamurikira abakunzi be by’umwihariko mu gisate cya Sinema.

Ni mwimurika ry’iyo filime kandi ryari ryitabiriwe na bamwe mu bakinnyi bayigaragaramo ndetse n’abayigizemo uruhare kugira ngo ikorwe.

Mighty Popo azwiho kuba umuyobozi w’ishuri rya Muzika rya Nyundo ryazamuye abahanzi batari bake mu Rwanda, yavuze ko iyi filime ije n’ubundi kuvuga ubuzima bw’umuziki muri rusange.

Ati “Urebye iyi filime ntaho itandukaniye na Muzika kuko n’ubundi ivuga ku buzima bw’abanyamuziki muri rusange, ubuzima babamo umunsi ku munsi, amajoro barara bakora iyo miziki n’ibindi byinshi.”

Mighty Popo avuga ko yamaze imyaka myinshi yita kuri filime ndetse ni na we wayiyoboye ‘Film Director’ wayo, mu gihe ifatwa ry’amashusho yayo ryakozwe na Anirban Mitra ukomoka mu Buhinde.

Iyi filime ‘Killer Music, Chapter 1: Blood Bird, The Saga’ ni imwe mu zizagaragaramo abantu batandukanye harimo ababyinnyi, abahanzi n’abanyamakuru nk’uko byemejwe na nyiri filime Mighty Popo.

Ati “Mu bantu bose nifuje gukorana nabo, yaba mu bahanzi dukora umunsi kuwundi, abanyamakuru,  ababyemeye twarakoranye, n’ikimenyimenyi Lucky Nzeyimana ari hano nawe ayirimo”.

Mighty Popo yashimiye abagize uruhare kuri iyi filime by’umwihariko kugira ngo ijye hanze harimo na Imbuto Foundation.

Ni filime yitezweho kugira uruhare mu kugaragaza ishusho ya Sinema y’u Rwanda ku rwego mpuzamahanga, aho yitabajwe na bahanga mu gukina filime. Mighty Popo avuga ko barebye impande zose zo mu Karere aho izagaragaramo abakinnyi bakomeye yaba abo mu Rwanda barimo Rwasibo, Lee Dia, Neema Rehema bazwi nka bahanzi, The Major wo muri Symphony n’abandi batandukanye ndetse nabo muri Kenya na Uganda.

Filime “Killer Music, Chapter 1: Blood Bird, The Saga” igaragaramo imirwano, urukundo, kubyina ndetse n’umuziki. Iri mu bwoko bw’izitwa “Musical Drama’’ ikaba iri m rurimi rw’Icyongereza. Aho imara amasaha abiri n’iminota irenga 40.

Mighty Popo avuga ko ari filime yatanze akazi ku barenga 300. Yavuze ko iyi filime bari gushaka imbuga izanyuzwaho zitandukanye zikomeye, ndetse n’aho yazerekanirwa mu nzu zerekanirwamo filime yaba hano mu Rwanda no hanze.

Iyi filime kandi yagizwemo uruhare n’abarimo Nasser Naizi na Meddy Saleh bakozeho nka “Directors of Photography’’ mu gihe umuziki wumvikanamo yaba mu kuwucuranga no kuwandika uretse Mighty Popo, byagizwemo uruhare n’abandi barimo Clément Ishimwe wari wanitabiriye igikorwa, Joachim Mugengakamere uzwi nka The Major na Nehemiah Shema.