Police Fc yamaze kugura rutahizamu Ani Elijah wakiniraga Bugesera Fc
Ikipe ya Police Fc yamaze kwegukana rutahizamu w’Umunya-Nigeria, Ani Elijah ku masezerano y’imyaka ibiri imukuye muri Bugesera Fc.
Iyi kipe y’abashinzwe umutekano ikomeje kwiyubaka kugira ngo izitware neza mu mwaka w’imikino utaha aho izanakina CAF Confederation Cup ya 2024/25 guhera muri Kanama.
Ishyirwa ry’umukono ku masezerano yo kwegukana uyu rutahizamu yabaye ku mugoroba wo kuri uyu wa 4 Kamena, aho Ani Elijah wari usigaje umwaka umwe muri Bugesera FC, aribwo yasinyiye Police FC amasezerano y’imyaka ibiri ndetse bivugwa ko yatanzweho miliyoni zigera kuri 50 Frw.
Ani Elijah ari mu bigaragaje mu mwaka w’imikino ushize aho yatsinze ibitego 15 muri Shampiyona, abinganya na Victor Mbaoma wa APR FC.
Andi makipe yamwifuje ni APR FC ndetse na Rayon Sports, ariko agenda biguru ntege mu kumugura.
Elijah umaze umwaka umwe mu Rwanda, kuri ubu ari mu bahataniye igihembo cy’umukinnyi mwiza w’umwaka wa 2023/24 aho ahanganye na Muhire Kevin wakiniraga Rayon Sports ndetse na Ruboneka Jean Bosco wa APR FC.
Rutahizamu Ani Elijah ni umwe mu bifujwe mu Ikipe y’Igihugu ’Amavubi’, akaba agiye gufasha Police FC gukemura ikibazo cyo kubona ibitego mu busatirizi bwayo.
