Niyo Bosco yambitse impeta inkumi bagiye kurushinga (Amafoto)
Umuhanzi Niyo Bosco yambitse impeta umukunzi we Mukamisha Irene biyemeje kurushinga mu minsi iri imbere.
Ni ibirori byabereye muri Hotel La Palisse Gashora mu ijoro ryo kuri uyu wa gatatu tariki 17 Nzeri 2025. Ku isaha ya Saa Tatu z’Ijoro nibwo ibirori byatangiye
Niyo Bosco akigera aho ibi birori byagombaga kubera, yabanje gufata gitari ye hanyuma abari kumwe n’umukobwa babona kumwinjiza, undi yinjiye agwa mu kantu abonye aho agiye hateguwe nk’ahagomba kubera ibi birori byo kwambikwa impeta bimwe bizwi nko “Gutera Ivi”.
Niyo Bosco nawe wari umaze kumva ko umukunzi we ahageze, yahise akirigita umurya wa gitari amuririmbira indirimbo y’urukundo hanyuma amufata ikiganza amubaza niba koko yakwemera ko barushinga, Irene nawe atazuyaje yahise yemerera Niyo Bosco kuzamubera umugore, undi nawe amwambika impeta abari aho amashyi bayakoma yombi.
Biteganyijwe ko vuba bidatinze hazakurikiraho Ibirori bijyanye n’imihango y’ubukwe nyuma y’uko Mukamisha Irene yemereye Niyo Bosco kuzamubera Umugore, mu birori byagaragaje ibyishimo byinshi haba kuri ba Nyiri ibirori ndetse n’abitabiriye.
Urukundo rwa Niyo Bosco bivugwa ko rumaze igihe, gusa byatangiye guca amarenga tariki 09 Nzeri 2025 ubwo uyu muhanzi yanyuzaga ku mbuga nkoranyambaga ze ubutumwa butaka Mukamisha Irene ku munsi w’isabukuru ye y’amavuko
Mu magambo yatambukije ku mbuga nkoranyambaga, yifuriza isabukuru nziza umukunzi we, Niyo Bosco yagize ati “ Ndakwifuriza isabukuru nziza, wavutse kugira ngo umutima wanjye ubashe kugukunda. Ntabwo ngukunda gusa ahubwo nkunda uburyo ngukundamo.”
Amafoto: IGIHE
