Minisitiri w’Ubuzima Dr Ngamije Daniel yabimburiye abandi bayobozi gufata urukingo rwa COVID-19
Minisitiri w’Ubuzima, Dr Ngamije Daniel, yabaye umwe mu bayobozi bakuru b’igihugu babimburiye abandi banyarwanda gukingirwa Covid-19.
Mu gitondo cyo kuri uyu wa Gatanu, mu gihugu hose hatangiye ibikorwa byo gukingira icyorezo cya Covid-19, nyuma y’iminsi ibiri u Rwanda rwakiriye inkingo za mbere zakozwe n’ibigo birimo AstraZeneca na Pfizer.
Minisitiri w’Ubuzima Dr Ngamije Daniel wafatiye Dose yambere y’urukungo rwa COVID-19 ku bitaro bya Masaka mu karere ka Kicukiro,avuga ko yiyumva neza mu mubiri ku buryo n’Abanyarwanda bose bakwitabira uru rukingo nk’uko inzego nkuru z’igihugu zikomeje kubibashishikariza.
Kuri uyu wa Kane, hiriweho ibikorwa byo gukwirakwiza izo nkingo ku bitaro n’ibigo nderabuzima, kugira ngo ibikorwa byo gukingira bitangire nta kibazo na kimwe gihari.
Mu duce dutandukanye, abakora mu nzego z’ubuzima kuva ku bakora mu bigo bya Leta, amavuriro, ibitaro, abageze mu zabukuru n’abandi bazindukiye kuri site zatoranyijwe, bategereje guhabwa urukingo rwitezweho gufasha igihugu gukingira Covid-19, bikaba umuryango uganisha ku gusubiza ibintu mu buryo ibikorwa by’iterambere bigasubukurwa uko byahoze.
Biteganyijwe ko bitarenze Kamena 2022, 60% by’Abanyarwanda bazaba bamaze gukingirwa ari nabwo hazaba hari icyizere cyuzuye cyo guhashya ubwandu bushya.
