Abaturage bambere ba Israel batangiye gufata urukingo rwa kane rwa COVID-19
Nk’uko byari biherutse gutangazwa n’ubuyobozi bwa Israel, abaturage bayo ba mbere bahawe urukingo rwa kane rwa COVID-19. Muri Israel ho bose bahawe urukingo rwo mu bwoko bwa Pfizer kuva babona urwa mbere kugeza kuri iyi nshuro ya kane.
Abaganga bo muri kiriya gihugu kiri mu bifite abaganga benshi ku isi ugereranyije n’abagituye(gikurikirwa na Cuba), batangaza ko gutanga ruriya rukingo byakozwe mu rwego rwo kureba niba rushobora guha uwaruhawe ubudahangarwa budasanzwe ku bwandu bwa COVID-19.
Abaruhawe ku ikubitiro ni abageze mu zabukuru, abafite uburwayi bwatumye ubudahangarwa bwabo buzahara nka cancer, n’abandi.
Nyuma yo kureba uko imibiri yabo izarwakira, biteganyijwe ko Minisiteri y’ubuzima muri Israel izageza inyandiko kuri Minisitiri w’Intebe Naftali Bennett ivuga niba yakwemeza ko ruriya rukingo rwahabwa abantu bose cyangwa niba hari ibindi byabanza kwitonderwa mbere y’uko rukwizwa hose.
Kimwe n’ahandi ku isi, Israel nayo yugarijwe n’ubwandu bushya bwa COVID-19 bwiswe Omicron bwandura vuba ariko ntibuzahaze cyangwa ngo buhitane abanduye nk’uko byagenze ku bwandu bwiswe Delta bwayogoje Isi mu mpera z’umwaka wa 2020.
Hari abatuye Isi batarakingirwa COVID-19 byibura inshuro imwe…
Mu gihe Israel ishaka gukingira abaturage bayo, hari ahandi ku isi mu bihugu byinshi cyane cyane ibyo muri Afurika abaturage batarahabwa urukingo na rumwe!
Ibi byatewe n’uko ibihugu bikize byikubiye inkingo zirenga 80% by’izakozwe ku ikubitiro n’izindi zikorwa muri iki gihe zikaba zidakwirakwizwa ku isi mu buryo bungana.
Ikindi kibitera ni uko kugeza ubu nta gihugu cyakwizera ko abaturage bacyo bakingiwe mu buryo budasubirwaho.
‘Uburyo budasubirwaho’ bushatse kuvuga ko abakingiwe bagomba kuba barubatse ubudahangarwa burambye k’uburyo batazongera kwandura kiriya cyorezo.
Ibi rero biragoye kubera ko imiterere ya virusi itera uburwayi bwa COVID-19 yihinduranya kenshi kandi mu buryo butari bwitezwe.
Omicron ivugwa muri iki gihe ifite ubushobozi bwikubye 32 ubwo Delta yari ifite mu mwaka wa 2020 ubwo yacaga ibintu ku isi.
Nta muhanga wakwihandagaza ngo avuge ko ari neza igihe iriya virusi izaba yaracikiye intege mu buryo budasubirwaho.
