UCL: Manchester City byayoroheye, Real Madrid yo ikomeza muri ¼ imitima y’Abafana ihagaze
Mu ijoro ryacyeye ubwo amakipe yakinaga imikino yo kwishyura ya UEFA Champions League, Manchester City byayisabye igice cya mbere kugira ngo ibe yasoje akazi kayerekeza muri ¼ cy’irushanwa naho Real Madrid ibanza kwibiza icyuya.
Mu mukino wabereye kuri Etihad Stadium, aho Manchester City yari yakiriye Copenhagen yo muri Denmark mu mukino wa kabiri wa ⅛, City ntiyatengushye abafana bayo kuko byayisabye iminota gusa itanu, yari yabonye igitego cya mbere cyatsinzwe na Akanji ku mupira mwiza warutewe na Alvarez.
Bidatinze ikipe ya Manchester City wabonaga ko ikomeza gushaka ibitego kugira ngo ishimangira urugendo ruyerekeza muri ¼ cy’irushanwa rya UEFA Champions League, ku munota wa cyenda Copenhagen itari yorohewe yaje kwisanga yakubiswe igitego cya kabiri cyaje gutsindwa n’Umunya-Argentine Alvarez.
Manchester City yari yaruhukije abakinnyi bayo bakomeye isanzwe ibanza mu kibuga mu rwego rwo kwitegura umukino ifite na Liverpool Fc mu mukino wa shampiyona y’Ubwongereza, Copenhagen yaje gukebuka ibona igitego cya mbere ku munota wa 29, gusa Manchester city yaje ntiyacitse intege kuko mbere y’uko bajya ku ruhuka Haaland yaje gutsinda igitego cya 3 bishimangira intsinzi, dore ko umukino waje kuza kurangira gutyo ntayindi yongeye kurunguruka mu izamu ry’iyindi.
Muri rusange, iyi kipe ya Manchester City yo mu Bwongereza yasezereye FC Copenhagen iyitsinze ku giteranyo cy’ibitego 6-2 mu mikino ibiri yabahuje.
Undi mukino wabereye ku kibuga cya Santiago Bernabeu aho Real Madrid yari yakiriye RB Leipzig yo mu Budage itayoroheye.
Real Madrid yinjiye mu kibuga ifite icyizere, yatangiye kugenda ibona itungurwa cyane imbere y’abafana bayo, aho RB Leipzig yagiye ikina ubona ishaka intsinzi yari gushyira akadomo ku rugendo rwa Real Madrid muri UEFA Champions League y’uyu mwaka, ariko ba myugariro bakayitabara hamwe n’umunyezamu.
Real Madrid yatabawe kenshi n’umunyezamu wayo Lunin, yafunguye amazamu ku munota wa 65 ku gitego cyatsinzwe na Vinícius Júnior nyuma yo guhabwa umupira mwiza na Jude Bellingham.
Gusa mu minota itatu, ikipe ya Leipzig ifite abana bato, yakomeje kutsa igututu, bahise bishyura ku mutwe mwiza watsinzwe na Willi Orban ku mupira yarahawe na David Raum.
RB Leipzig yagerageje gushaka ikindi gitego cya kabiri ngo nibura bajye mu nyongera irakibura, umukino urangira amakipe yombi anganyije igitego 1-1.
Kubera ukuntu uyu mukino wagoye Madrid, umutoza Ancelotti yavuze ko yakoze ikosa mu bakinnyi yabanje mu kibuga ndetse ko uwari kumuha amahirwe yari gukoresha ikipe itandukanye niyo yabanje.
Real Madrid yahise ikomeza muri ¼ ku giteranyo cy’ibitego 2-1 kubera ko umukino ubanza wabereye mu Budage, yari yatsinze igitego 1-0 cya Brahim Diaz.
