Kenya: Abanyeshuri 17 bishwe n’inkongi y’umuriro yibasiye ikigo cy’amashuri
Nk’uko byemejwe na Polisi y’Igihugu, yavuze ko abantu bagera kuri 17 aribo bapfuye nyuma y’inkongi y’umuriro yibasiye uburaro bwacumbikiraga abanyeshuri mu kigo giherereye muri Kenya mu ijoro ryo kuwa Kane tariki 5 Nzeri 2024.
Icyateye iy’inkongi yibasiye iki kigo cy’amashuri abanza ya Hillside Endarasha Academy giherereye mu Ntara ya Nyeri ntikiramenyekana.
Umuvugizi w’iri shuri, Onyango Resila mu kiganiro yahaye Radio Hot 96 FM yo muri Kenya yavuze ko mugihe ubutabazi bugikomeje gutangwa, abayobozi bakwiriye kuzakurikiranwa kugira ngo bazatange ibisobanuro birambuye.
Uyu muvugizi yemeje ko umubare w’abaguye muri iryo sanganya ry’umuriro ari abagera kuri 17 abandi barakomereka.
Ati “Abanyeshuri 17 nibo bahise bitaba Imana, abagera kuri 14 barakomereka, itsinda ryacu kuri ubu ririmo kubikurikirana.
Umukuru w’igihugu cya Kenya, William Ruto yavuze ko ibyabaye bite ubwoba kandi biteye n’urujijo ku bw’ibyo asaba ko hahita hatangira gukora iperereza.
Mu butumwa yanyujije ku rukuta rwa X, yagize ati “Ndategetse inzego zibishinzwe ritangira gukora iperereza kuri iki kibazo. Ababikoze babibazwe.”
Polisi yemeje ko itsinda rigari rikora iperereza ryamaze koherezwa muri iri shuri.
Umuyobozi wa Polisi, Pius Murugu, yavuze ko abanyeshuri barenga 150 aribo bari mu buraro bucumbikira Alabanyeshuri (dortoir) ubwo umuriro wabibasiraga mu gicuku.
Amakuru yatangajwe n’abanyamakuru bahise bagera aho ibyo byago byebereye bavuze ko uwo muriro wahise ukwirakwira hose byihuse bitewe n’uko iri shuri ryari ryubakishije ibiti.
