Norvège yoherereje u Rwanda Francois GASANA wari warakatiwe kubera ibyaha bya Jenoside
Uyu munsi tariki ya 8 Kanama 2025, Ubushinjacyaha Bukuru bwakiriye umunyarwanda witwa Francois GASANA alias Franky DUSABE woherejwe n’Igihugu cya Norvège kuza kuburanira mu Nkiko z’Urwanda kubera ibyaha akekwaho bya Jenoside.
Mu mwaka wa 2007 Gasana yakatiwe n’Urukiko Gacaca rwa NYANGE ahanishwa igifungo cy’imyaka 19 kubera uruhare yagize muri Jenoside yakorewe Abatutsi.
Francois GASANA yavutse mu mwaka wa 1972, muri selire ya BITABAGE, segiteri ya NDARO, akarere ka NGORORERO, mu ntara y’Iburengerazuba. Mu gihe cya Jenoside GASANA yari umunyeshuri, akaba yarabaga mu ntara y’Uburengerazuba, akarere ka NGORORERO, muri segiteri ya NDARO.
Ubushinjacyaha Bukuru bw’Urwanda burashimira ubufatanye bw’inzego z’ubutabera za Norvege, mu kurwanya ibyaha muri rusange, ndetse n’uruhare rwabo mu rugamba rwo kurwanya umuco wo kudahana.
