Perezida wa Chad Idriss Déby Itno yapfuye arashwe
Kuri uyu wa kabiri tariki 20 Mata 2021 nibwo Igisirikare cya Chad cyatangaje ko Perezida Idriss Déby Itno yapfuye azize ibikomere nyuma yo kurasirwa ku rugamba mu minsi ishize.
Ibi bitangajwe nyuma y’uko ibyavuye mu matora yabaye kuya 11 Mata 2021 by’agateganyo bigaragaza ko yatsindiye kuyobora manda ya gatandatu.
Aya matora yabaye mu bihe ubutegetsi bwe bwari busumbirijwe n’inyeshyamba.
Nk’uko byatangajwe na BBC dukesha iyi nkuru ivuga ko ingabo za Chad zikomeje kurwana n’inyeshyamba zagabye ibitero ku murwa mukuru N’Djamena.
Kuri Televiziyo ya leta umuvugizi w’ingabo General Azem Bermandoa Agouna yatangaje ko mu minsi ishize Maréchal Idriss Déby Itno yarasiwe ku rugamba n’inyeshyamba mu gace ka Kanem mu majyaruguru.
Déby Itno wari ufite imyaka 68, yari ku butegetsi kuva mu 1990.
Igisirikare cyahise gitangaza iseswa rya guverinoma n’inteko ishingamategeko, no gushyirwaho kw’inzibacyuho.
Iyo nzibacyuho y’amezi 18 izayoborwa n’akanama ka gisirikare gakuriwe na Mahamat Idriss Déby, umuhungu wa Idriss Déby Itno, usanzwe ari Umujenerali mu ngabo za Chad.
Perezida Idriss Deby wa Chad yapfuye
Igisirikare kimaze gutangaza ko Perezida Idriss Deby Itno yapfuye azize ibikomere nyuma yo kurasirwa ku rugamba. pic.twitter.com/EuBtlzhKbk
— BBC News Gahuza (@bbcgahuza) April 20, 2021
