CAF Confederation Cup: Tombola yasize Police Fc izahura n’ikipe yo mu gihugu cya Algeria mu ijonjora ry’ibanze
Kuri uyu wa Kane, tariki 11 Nyakanga, Muri Misiri ku cyicaro gikuru cy’Impuzamashyirahamwe y’Umupira w’amaguru muri Afurika, CAF, habereye umuhango wa tombola kugira ngo hagaragazwe uko amakipe azahura mu ijonjora ry’ibanze ry’imikino ihuza amakipe yatwaye ibikombe bya shampiyona imbere mu gihugu, CAF Champions League n’ayatwaye ibikombe iwayo, CAF Confederation Cup.
Muri tombola yabaye ya CAF Confederation Cup byarangiye ikipe ya Police FC yisanze izahura n’ikipe yo mu cya Algeria ariyo Club Sportif Constantine.
Iyi tombola yasize Police FC ihagarariye u Rwanda muri CAF Confederation Cup, imenye ko izakina na Club Sportif Constantine yo mu gihugu cya Algérie.
Police Fc imaze iminsi yarasubukuye imyitozo izabanza muri Algérie, umukino wo kwishyura uzabere i Kigali.
Izasezerera indi hagati y’izi zombi, izahita ihura n’izaba yasezereye indi hagati ya Nsoatreman FC yo muri Ghana na TP Elect Sport yo muri Chad.
Ni mugihe imikino ibanza iteganyijwe kuzakinwa tariki ya 16-18 Kanama, mu gihe iyo kwishyura iteganyijwe kuzakinwa tariki ya 23-25 Kanama.
Imikino ibanza y’icyiciro cya Kabiri mu ijonjora ry’ibanze, izakinwa tariki ya 13-15 Nzeri, mu gihe iyo kwishyura izakinwa tariki ya 20-22 Nzeri.
