Abanyeshuri 429,151 nibo bagomba gukora ibizamini bya Leta
Kuri uyu wa Mbere taliki ya 18 Nyakanga 2022, mu Gihugu hose hatangiye ibizamini bya Leta byahereye ku banyeshuri basoza amashuri abanza basaga 229,859 biga mu bigo by’amashuri 3,556, bakoreye kurii site z’ibizamini 1,095.
Abakora ikizamini cya Leta gisoza amashuri abanza babimburiye abanyeshuri bose bazakora ibizamini bya Leta byanditse babarirwa mu 429,151.
Uretse abakora ikizamini gisoza amashuri abanza bazasoza ku wa Gatatu taliki ya 20 Nyakanga, bazakurikirwa n’abakandida 127,469 basoza icyiciro cya mbere (O-Level), 47,579 basozaicya kabiri cy’amashuri yisumbuye (A-Level) na 21,338bakora ibizamini byanditse muri (TVET) bazakora guhera ku wa 26 Nyakanga basoze ku ya 02 Kanama 2022.
Ku basoza amashuri nderabarezi (TTC) uko ari 2,906 na bo biteganyijwe ko bazakorera rimwe na bagenzi babo basoza icyiciro cya mbere n’icya kabiri cy’aamshuri yisumbuye.
Ku basoza amashuri yisumbuye biga siyansi, biteganyijwe ko bo bazatangira ibizamini bya Leta byabo zizatangira ku ya 3 kugeza ku ya 5 Kanama 2022.Ni mu gihe abiga mu mashuri y’imyuga n’ubumenyi ngiro (TVET) bakoze ibizamini ngiro guhera ku ya 27 Kamena kugeza ku ya 14 Nyakanga 2022.
Atangiza ku mugaragaro ibizamini bya Leta kuri uyu wa Mbere, Minisitiri w’Uburezi Dr. Uwamariya Valentine, yifurije amahirwe masa abatangiye gukora uyu munsi ndetse n’abiteguye gukora mu minsi iri imbere.
Yagize ati: “Abana turabifuriza intsinzi. Burya iyo cyise ikizamini gitera ubwoba. Hari igihe rero abanyeshuri bagira ubwoba agatsindwa atari uko atabizi, ahubwo ari ubwoba yagize. Ubutumwa ni ukubahumuriza nta cyateguwe kiri hanze y’ibyo bize birasaba kwicara bagatuza bakabyibuka noneho bakabishyira ku rupapuro.”
Yakomeje asaba ababyeyi kutabuza abana amahirwe yo gukora ibizaminikuko hari abababuza gukora kandi bariyandikishije.
Ati: “Ku babyeyi turasaba yuko nta numwe wacikanwa n’ayo mahirwe kuko hari igihe bijya bigera ugasanga abanyeshuri bariyandikishije ariko twajya kureba abakoze tugasanga bagabanyutse turasaba rero ko nta mubyeyi wabuza umwana ayo mahirwe kuko ni ukumuvuta ejo heza he ko basaba abana bose bakiri mu ngo biyandikishije gukora ibizamini baze bitabire nk’uko nabivuze.”
Uyu mwaka abakoze ibizamini bya Leta mu mashuri abanza bagabanyutseho kuko abakoze mu mwaka ushize bari ibihumbi 254. Gusa mu ashuri yisumbuye ho bariyongereye. Ati: “Ntabwo bivuze ko hari abanyeshuri bavuyemo ahubwo buri mwaka ugira umwihariko wawo, biterwa n’uko abanyeshuri bazamutse.”
Yanasabye abanyeshuri n’abarimo kugenzura ibizamini kwirinda imico yo gukopera no gukopezanya yagiye igaruka mu myaka yashize, ati: “Iyo hakozwe ibizamini twirinda ko hagaragaramo imico itari myiza ni ko twavuga kuko ntitwifuza ko hagaragara ko abanyeshuri bakopera, ndetse hari n’aho abarimu mu myaka yashize hari abarimu bakopezaga abanyeshuri.”
Yijeje abanyeshuri ko bacungiwe umutekano ndetse inzego zikomeje gufatanya mu gufasha abanyeshuri gukora ibizamini mu mutekano usesuye.
