Manchester City yaciye agahigo ka Real Madrid
Ikipe ya Manchester City yo mu Bwongereza yaciye agahigo kari gasanzwe gafitwe n’ikipe ya Real Madrid ko kuba ikipe ihenze ku Isi.
Iy’ikipe ibarizwa muri Premier League agaciro kayo kiyongereyeho 15% igera kuri miliyari 1.29 by’amapound ziyongera kuri Champions League mugihe yaramuka itsinze Inter de Milan mu mukino wa nyuma uzaba kuwa gatandatu tariki 10 z’uku Kwezi.
Aka kayabo yagakuye ku kuba yaregukanye shampiyona y’Ubwongereza Premier League, ndetse na FA Cup.
Isesengura ryakozwe na Brand Finance ryerekana ko ibyo byatumye baca agahigo kari gasanzwe gafitwe n’ikipe ya Real Madrid, agaciro kayo kamanutseho gatatu ku ijana kagera kuri miliyari 1.26.
Icyakora, Brand Finance yavuze ko Real yagumye kuba ikipe ikomeye mu mupira w’amaguru ku Isi kandi bishoboka cyane ko izafatwa nk’ikipe nziza y’abafana ku isi.
Ikipe ya Barcelona yaje ku mwanya wa gatatu kuri uru rutonde, aho yiyongereyeho gatanu ku ijana ku gaciro kayo igera kuri miliyari 1.185 z’amapound, ni mugihe Manchester United yaciye imbere ya mukeba wayo Liverpool ikaza ku mwanya wa kane.
United ifite agaciro ka miliyari 1.174 z’amapound (yiyongereyeho 11%) na Liverpool miliyari 1.173 z’amapound (yiyongereyeho icyenda ku ijana).
Raporo ivuga ko Manchester united yongeye kwiyunga n’abafana ndetse ibasha kwitwara neza muri shampiyona ibikesheje umutoza wayo Erik ten Hag.
Paris Saint-Germain na Bayern Munich bafashe umwanya wa gatandatu n’uwa karindwi nyuma yuko amakipe atatu ya Premier League ariyo Arsenal, Tottenham Hotspur na Chelsea zifunga urutonde rw’amakipe 10 ya mbere.
Mu myaka itanu, ikipe ya Manchester city imaze kwiganza mu mupira w’amaguru mu Bwongereza, aho imaze kwegukana ibikombe bine bya shampiyona y’icyiciro cya mbere mu bihe bitandukanye mu myaka itanu ishize.
